Noraisin’ny Minisitry ny Tanora sy ny Fanatanjahantena, Andriamatoa TINOKA Roberto tao amin’ny biraony ao Ambohijatovo anio 8 Jona 2021, ireo tanora mpikatroka ny taranja « savate boxe française » izay manoman-tena hiatrika ny fiadiana izay ho tompondaka eran-tany any Serbie, Eoropa Antsinanana ny 30 Jona hatramin’ny 4 Jolay 2021 ho avy izao.
Nitso-drano azy ireo Andriamatoa Minisitra nandritra ny fihaonana ary namporisika ny hanohizana hatrany ny fanaovana fanatanjahantena satria manana tombony tokoa hoy izy ny mpanao fanatanjahantena indrindra fa ny mpanao Hay Ady amin’ny fananany ny « esprit combattant ».
Namaly ny fangatahan’izy ireo ihany koa Andriamatoa Minisitra ary hitondra ny anjara birikiny ny Minisitera ho fanampiana azy ireo amin’ny fandehanana any Serbie.
Tetsy ankilany, dia nitondra ny teny fisaorana ho an’ny Ministeran’ny Tanora sy ny Fanatanjahantena ny solotenan’ireo mpikatroka ary nampanantena izy ireo fa tsy hody tanam-polo ary nanome toky fa vonona hiaro ny voninahi-pirenena.
Teo am-pamaranana dia nanambara Andriamatoa Minisitra fa ny filoha hajaina Andry RAJOELINA no tena hisaorana amin’ny fanampiana ny Tanora sy ny Fanatanjahantena.
