Tonga nitsidika ny Minisitry ny Tanora sy ny Fanatanjahantena Andriamatoa MAMOD’ALI Hawel ny masoivohon’ny firenena Japoney monina eto Madagasikara Andriamatoa Yoshihiro Higuchi anio 15 Oktobra 2021.
Noresahina nandritra izany ny fiaraha-miasa eo amin’ny firenena roa tonta sy ny amin’ny hanavaozana izany fiaraha-miasa efa nisy hatramin’ izay izany eo amin’ny sehatry ny Tanora sy Fanatanjahantena.
Ny fanomanana ny Lalaon’ny Nosy hoy Andriamatoa minisitra no akaiky indrindra ary eo koa ny tetikasa handefasana atleta malagasy hiofana any Japana sy ny fanafarana manam-pahaizana (expert) manokana ara-panatanjahantena Japoney ho avy eto Madagasikara ho fanomanana ireo lalao iraisam-pirenena lehibe handraisantsika anjara.
Noresahina ihany koa ny fiaraha-miasa mahakasika ny tanora ka niompana indrindra tamin’ny fijerena akaiky ny » Institut National de la Jeunesse » izay tetik’asa novolavolain’ny Talen’ny INJ Atoa Thierry RABARINALA niaraka tamin’ny Masoivoho teo aloha ka hotohizan’ny Masoivoho vaovao ho mariky ny fitohizan’ny fiarahamiasa.
Izany no natao dia ho fanomezan-danja ny tanora amin’ny alalan’ny fanavaozana hisy eny amin’izany Institut izany. Isika rahateo dia misitraka » volontaire » Japonais fiarahamiasa miaraka amin’ny fikambanana JICA izay samy misitraka izany na ny sehatry ny tanora na fanatanjahan-tena.
