Nanohy ny fidinana ifotony teto Ambatondrazaka ny Minisitry ny Tanora sy ny Fanatanjahantena, Andriamatoa Hawel MAMOD’ALI, anio 05 Novambra 2021. Nanao fitsidihana ara-teknika ny Kianja Manarapenitra Andriamatoa Minisitra nandritra izany, ary notronin’ireo olom-boafidy sy manam-pahefana tao an-toerana.
Araka ny tombana, dia hita fa manaraka ny fenitra ity fotodrafitrasa ity ary efa mamaraparana ny asa.
Taorian’izay dia nihaona tamin’ireo mpiara-miasa teo anivon’ny Fitalevam-paritry ny Tanora sy ny Fanatanjahantena ny tenany amin’ny fomba hanatsarana ny asa. Nambarany fa amin’ny alalan’ny fanatanjahantena no hamerenana ny hambompom-pirenena araka ny voalazan’ny velirano faha 13.
Samy nandray anjara fitenenana ireo mpiasa teo anivon’ny Fitaleavam-paritry ny Tanora sy ny Fanatanjahantena Alaotra Mangoro nilaza ireo hetaheta entina hampandrosoana ny tanora sy ny fanatanjahantena ary nampanantena izy fa hiezaka hamaha miandalana ny hetahetan’izy ireo.
Nambarany ihany koa fa mila miasa sy miezaka ny tsirairay mba ahafahana mampiroborobo ny departemantan’ny tanora sy ny fanatanjahantena.
