Araka ny toromarika nomen’Andriamatoa MAMOD’ALI Hawel, Minisitry ny Tanora sy ny Fanatanjahantena mahakasika ny fitantanana mahomby ireo foto-drafitrasa ho an’ny fanatanjahantena, dia nanatanteraka dinika sy fiaraha-mamolavola ny paika entina hiatrehana izany ireo tompon’andraikitra eto Morondava sy ny avy amin’ny Ministera foibe.
Ho fiatrehana ny fitantanana ny Kianja manara-penitra eto Morondava izay tombanana ho vita ato anatin’ny volana vitsy, dia nodinihina ny fomba matihanina hikojakojana maharitra ny foto-drafitrasa sy ny fomba fampiodinana azy hahaleo tena. Nojerena indrindra koa ny fomba ahafahan’ny mpanao fanatanjahantena sy mponina rehetra ao amin’ny faritra misitraka ireo fotodrafitrasa.
Nizara sy nampita ireo traikefa amin’ny fitantanana ny tompon’andraikitra avy ao amin’ny TAFITA sy ny teknisiana misahana ny fananana sy ny fotodrafitrasa eo anivon’ny Ministera foibe. Izany dia tafiditra ao amin’ny dingan’ny fitsinjaram-pahefana tena izy.
Etsy an-kilany dia nodinihina manokana ihany koa ny fanomezan-danja manokana ny fanatanjahantena eny amy ny tora-pasika( sports des plages) , kianja natoraly, tsy ilana volabe, izay tena mampanakarena ny Faritra Menabe nefa tena mahomby ho amin’ny fitaizam-batana sy fanomanana taniketsan’ny tanora mpanao fanatanjahantena. Apetraka ho laharam-pahamehana noho izany ny fampitaovana eny amin’ireo tora-pasika vitsivitsy ; miara-dalana aminy fiofanana manatona vahoaka (na formation décentralisée) hotaterahin’ny ANS manomboka amy volana Aprily 2022 ity.
