Tonga niarahaba ny Praiminisitra, Andriamatoa Ntsay Christian, sy Ramatoa vadiny, nahatratra ny taona vaovao 2022 ireo mpikambana rehetra ao amin’ny governemanta Malagasy, androany maraina.
Ny minisitry ny Fiarovam-pirenena no nitondra ny teny firarian-tsoa tamin’ny anaran’ny governemanta, ho an’ny Praiminisitra mivady, « manoloana ny adidy mavesatra iandraiketana eto amin’ny Firenena », ary nisaotra ny Lehiben’ny governemanta manokana tamin’ny fiaraha-miasa nentina nampandrosoana ny tanindrazana hatrizay.
Teo anatrehan’izany dia naneho ny hafaliany ny Praiminisitra ka nanao teny fisaorana, ary nambarany fa « nahatsipaka » ny taona 2021 isika ka « Andriamanitra manakarem-pahasoavana anie hitahy sy hitondra fahombiazana feno ho an’ny tsirairay sy ny firenena ».
Notsiahivin’ny Praiminisitra fa nandalo fotoan-tsarotra ny firenena nandritra iny taona 2021 iny, ary nisy ireo fanapahan-kevitra tsy maintsy noraisina manoloana ny toe-java-nisy, ka ny fanamby andrasana amin’ny mpikambana dia ny hanatrarana ny tanjona napetraky ny governemanta.
Teo no nanamafisany ny « tokony hisian’ny firaisan-kina eo anivon’ny governemanta mba ho tanteraka hatrany ny fampandrosoana ny firenena, ary adidin’ny tsirairay ny manampy ny Filoham-pirenena amin’ny fahaiza-manao, ny herim-po, ny fahamarinana ; satria nametraka fitokisana tamintsika ny Filoha tamin’ny nanendreny antsika, ka anjarantsika no mampiseho fahamendrehana amin’izany andraikitra izany, amin’ny alalan’ny asa ho an’ny firenena ».
Sarotra ny manatanteraka ny zava-drehetra, hoy ny Praiminisitra, ka isika no mijery ny fomba fiasa tokony hapetraka mba hanatrarana ny tanjona, dia ny fampandrosoana.
Mahazoarivo, 05 janoary 2022
