Amin’ity taona 2022 ity dia hatomboka any amin’ny Faritra Ihorombe, Menabe ary Alaotra Mangoro ny fijerena sy fanaraha-maso ny fahasalaman’ireo Tanora.
Noho izany dia notontosaina io maraina io teny amin’ny Centre d’Infectiologie Charles Merieux Ankatso ny fanaovan-tsonia fifanaraham-piaraha-miasa teo amin’ny Minisiteran’ny Tanora sy ny Fanatanjahantena sy ny Fondation Merieux.
Noraisin’ny roa tonta ny andraikitra hanentanana sy hampianarana ny Tanora ny fahaiza-midio, ny fahaiza-mitondra-tena ary indrindra ny fandraisana andraikitra ara-pahasalamana.
Ny tanjona amin’izany dia ny hanentanana ireo Tanora izay tsy mandeha an-tsekoly mahakasika ireo hevi-dehibe mifandraika amin’ny fahasalam-bahoaka amin’ny alalan’ny fanomezana azy ireo ny fitaovana fanentanana ara-pahasalamana izay mifanaraka amin’izay ilain’izy ireo, indrindra ho an’ny fahasalamana ara-pananahana, ny areti-mifindra ary ny fiankinandoha izay mahakasika ny Tanora amin’ny ankapobeny.
Teo ihany koa ireo fitaovana informatika natolotra mba hoampiasain’ireo Tranoben’ny Tanora amin’ny fanentanana sy ho firaketana ny asa vita.
Ny fanaovan-tsonia sy fanolorana ireo fitaovana ireo moa dia notanterahin-dRamatoa Tale Jeneraly ny Tanora, Noro Haingo RAKOTOSEHENO sy Andriamatoa Marc Bonneville, « Directeur Général Adjoint » Fondation Merieux Paris izay samy nohotronin’ireo mpiara miasa sy mpiara-miombon’antoka amin’izy ireo avy.
VMJ Feb 2022