Noraisin’ Andriamatoa Filoham-pirenena Andry RAJOELINA teny amin’ny lapam-panjakana Iavoloha ny 4 may lasa teo ireo mahery fo Malagasy MAKIS 7s vehivavy izay nitondra avo ny voninahim-pirenena tany Tunisie, nandritra ny Africa women’s seven 2022.
Ny fifaninanana izay natao tany dia nitondra an’i Madagasikara ho anisan’ny mpandray anjara amin’ny fiadiana izay ho tompondaka maneran-tany izay hatao ny volana septambra ho avy izao any Afrika Atsimo.
Nitarika ireto delegasiona, Andriamatoa TINOKA Roberto, Minisitrin’ny Tanora sy ny Fanatanjahantena sy ny Filohan’ny Federasiaona Malagasin’ny taranja Rugby, Andriamatoa Marcel RAKOTOMALALA.
Amin’ny maha tompon’andraikitra voalohany ny Fanatanjahantena azy, dia nisaotra ny zava-bita tamin’ny fiarovana ny voninahim-pirenena ny tenany ary nanamafy ny fahavononan’ny Minisitera izay tantaniny hanohana ny Fanatanjahantena rehetra.
Notolorana fanomezana avy amin’ny fitondram-panjakana izy ireo ho mariky ny fitiavana sy fankasitrahana amin’izao ezaka goavana nasehony izy ireo izao.
Ary hisitraka fanampiana manokana avy amin’ny fitondram-panjakana mba ho fanohanana ireo mpilalao hiatrika ny fanomanana io lalao lehibe io.
