Tontosa ny 21 Jolay 2022 tao amin’ny AROTEL Antsirabe ny valan-dresaka hoan’ny mpanao gazety izay niarahana tamin’ny Federasionina Malagasy ny taranja Basketball (FMBB) sy ny Komity mpikarakara ny « AFROBASKET U18 » (COCAN) ho fanolorana amin’ny fomba ofisialy ity lalao ity ho an’ny tanànan’Antsirabe.
Ekipa vehivavy miisa valo no handray anjara amin’ity lalao ity ary ny alahady faha 24 Jolay izao no higadona ao Antsirabe ny ekipam-pirenena Malagasy « ANKOAY » U18 zazavavy hiatrika ny tohin’ny fanazarantena.
Tonga nanatrika ity valan-dresaka niarahana tamin’ireo mpanao gazety ity ny Tale Jeneralin’ny Fanatanjahantena, Ramatoa Rosa RAKOTOZAFY, nisolotena an’Andriamatoa Minisitra TINOKA Roberto. Nandritra ny fandraisam-pitenenana izay nataony no nanambarany ny fanohanana avy amin’ny fitondram-panjakana Malagasy izay antoka voalohany nahafahana nampianatrano ity fifaninanana iraisam-pirenena ity.
Zava-dehibe ho an’ny fitondram-panjakana izay tarihin’ny Filoham-pirenena Andry RAJOELINA ny fametrahana fotodrafitrasa miparitaka manerana ny Nosy izay antony iray nahafahatsika mampiantrano lalao iraisam-pirenena toy izao aty amin’ny faritra.
Midika izany fa tsy mijanona amin’ny fanamboarana fotodrafitrasa fotsiny ny Fanjakana Malagasy fa mifantoka ihany koa amin’ny fandraisana lalao iraisam-pirenena izay hotanterahina eny amin’ny faritra hahafahana manao izany ary anisan’izay ny Kianja mitafon’i Vatofotsy izay nahazo fankatoavana avy amin’ny Federasiona Iraisam-pirenena ny Taranja Basketball na FIBA
Ny Minisiteran’ny Tanora sy ny Fanatanjahantena, izay eo ambany fitarihan’Andriamatoa Minisitra TINOKA Roberto dia mankasitraka mandrakariva ny fiaraha-miasa rehetra misy eo anivon’ny Governora, ny Kaominina sy ny mpiara-miombon’antoka rehetra tsy ankanavaka amin’ny fanohanana ny fanatanjahantena indrindra mandritra ny fandraisana lalao lehibe toy izao izay fomba iray lehibe anehoana ny tena Firaisankina.
