Notanterahana tao Mahajanga ny 09 hatramin’ny faha 11 Aogositra 2022 ny fampiofanana mahakasika ny « Life Skills Fanoitra » na ny fahalalana fototra ho entina mahomby eo amin’ny fiainana ho an’ny Tanora.
Tanora avy amin’ny distrika 18 eto Madagasikara no nanao ny famolavolana sy ny fampiharana ny programa Fanoitra, izay tetik’asa hanohanana ny Tanora ho ivon’ny fampandrosoana eny ifotony.
Fampianarana mba hanana Vina ahafahan’ireo tanora hitsinjo lavitra amin’ny fiainana no tanjona amin’izany. Nofanina hanana « vinam-pihariana ho an’ny fizakan-tena manokana », « Vina ara-tsosialy » ary « vinan’andraikitra eo anivon’ny fiarahamonina » izy ireo ahafahany manomboka ny fanovana eny ifotony avy hatrany.
Noresahana nandritra izany ny :
– Ady amin’ny vohoka aloha loatra
– Ady amin’ny herisetra mihatra amin’ny ankizy sy ny vehivavy na amin’ny mahalahy sy amin’ny mahavavy.
– Fanabeazana sy fandriam-pahalemana
– Ady amin’ny kolikoly
– Tontolo iainana sy tsy fanjarian-tsakafo ary ny fiadiana amin’ny fiovaovan’ny toetr’andro.
– Fanatanjahantena sy fialamboly iatrehana ny ady amin’ny zava- mahadomelina.
Tohin’ny asa izay efa natomboka tao Betroka, distrika filamatra amin’izany programa Fanoitra izany, ity fampiofanana ity, ary hapariaka manerana an’i Madagasikara.
