Notanterahana ny 27 novambra 2022 ny fitokanana ny kianja manarapenitra vaovao ao Manakara, Faritra Fitovinany.
Tonga nitokana izany ny Filohan’ny Repoblika Andry RAJOELINA, notronin’Andriamatoa Praiminisitra NTSAY Christian ary ny Minisitry ny Tanora sy ny Fanatanjahantena, Andriamatoa TINOKA Roberto, notronin’ny Ramatoa Christine RAZANAMAHASOA, Filohan’ny Antenimeram-pirenena sy ny Filoha Lefitrin’ny Antenimeram-doholona, Andriamatoa Nicolas RABEMANANJARA ary ireo olo-manankaja ambony maro samihafa niaraka tamin’ny vahoakan’i Faritra Fitovinany.
Nandritra ny fandraisam-pitenenana izay nataon’Andriamatoa Minisitra no nisaorany sy nankasitrahany ny Filoham-pirenena. Nasongadiny tamin’izany ny maha- zava-dehibe ny fananana fotodrafitrasa ara-panatanjahantena raitra toy izao, izay entina hikarakarana ny tanora sy hampiasaina amin’ny lafiny fanabeazana.
Nambarany fa efa eo andalam-pamitana koa ireo Kianja Mitafo miisa 18 hijoro tsy ho ela eny anivon’ny Faritra sy ny Distrika manerana ny Nosy.
Notsipihany manokana ihany koa ny fahavonan’ny Fitondram-panjakana amin’ny fandraisana ny Lalaon’ny Nosy andiany faha-11 eto Madagasikara amin’ny taona 2023.
Namafisin’Andriamatoa Ministra fa fananana iaraha-manana ny foto-drafitrasa toy izao, izay hipetraka ho an’ny taranaka faramandimby ka noho izany indrindra no anentanana ny rehetra amin’ny fikojakojana sy fikarakarana ary indrindra ny fanajana ny Kianja.
Tsy diso anjara araka izany ny tanora sy ny mpanao fanatanjahantena eto Manakara satria afaka mandray anjara tanteraka amin’ny fanomanan-tena sy mandray ary mikarakara lalao eto an-toerana.
Teo ampamaranana dia nanolotra fitaovana ara-panatanjahantena toy ny baolina sy fanamiana ho an’ireo klioba sy ho an’ny ligim-paritra Fitovinany ny Filoham-pirenena Andry RAJOELINA.
