Tontosa ny 11 jona 2023, tetsy amin’ny kianja Makis Andohatapenaka ny Festival des Rugbys 2023 izay hetsika eo ambany fiahian’ny Minisiteran’ny Tanora sy ny Fanatanjahantena hiarahana amin’ny Masoivohon’i Frantsa monina sy miasa eto Madagasikara, ny Rugby Malagasy, ny Terres en Mêlées ary ny Comité de Rugby de La Réunion.
Fankalazana ny fiadiana ny amboara eran-tany izay hatao any Frantsa amin’ity taona ity ary ho entina hampiroboroboana ity taranja ity eto Madagasikara no tanjona tamin’izany.
Nandritra izany dia lalao maro samihafa izay nahitana sokajy Minimes, Benjamins, Juniors, ary sokajy Seniors no nandraisan’ireo klioba maro avy eto an-drenivohitra sy avy any amin’ny faritra ary ny avy ao amin’ny nosy la Réunion anjara tamin’ity hetsika ity.
Nisy ihany koa ny lalao izay nifanandrinan’ny ekipam-pirenena malagasy, Makis de Magasikara, sy ny ekipa voafantina avy ao amin’ny Nosy La Réunion ary nivoaka mpandresy tamin’izany ny Makis Madagasikara tamin’isa 55 noho 20, izay nentina namarana ny fotoana.
Notoloran’ny Comité de rugby de la Réunion fitaovana toy ny baolina ireo tanora mpilalao eo anivon’ny Terres en Mélées avy any Toliara izay tonga nandray anjara.
Tonga nanome voninahitra izany ny Minisitry ny Tanora sy ny Fanatanjahantena, Andriamatoa André Haja RESAMPA, notronin’ny Filohan’ny Antenimerandoholona, ny Ambasadaoron’i Frantsa miasa sy monina eto Madagasikara ary ireo olona manan-kaja maro samihafa.
